სოფო დიასამიძე იმ იშვიათი პროფესიის წარმომადგენელია, რომელიც არათუ ქალებში გვხვდება, არამედ, ზოგადად, პოპულარობით არ სარგებლობს. ის მეთევზეა და ამავდროულად, ორგანული აკვაკულტურის განვითარების ასოციაცია “ფორეჯის” ხელმძღვანელობს.
ასოციაცია 2016 წელს დაარსდა და დარგის კვლევასა და განვითარებაზეა ორიენტირებული. მისი წევრები აქტიურად მუშაობენ თევზის გენეტიკური პრობლემებსა და ლიფსიტის გამოზრდის საკითხებზე. ასევე, ასოციაციის ორგანიზებით ბათუმი თევზისა და ზღვის პროდუქტების ყოველწლიური ფესტივალი იმართება.
სოფო ყველაზე კომფორტულად თავს სოფელში გრძნობს, პროექტის “ქედა ლიდერი”-ს ფარგლებში CENN-ის, დემოკრატიის ინსტიტუტისა და ქედის განვითარების ჯგუფის დაფინანსებით სოფელ ზედა წონიარისში საწარმო დააარსა და ადგილობრივები დაასაქმა.
მისთვის მეთევზეობა შეძენილი პროფესია, ბევრი რამ მამისგან გაიგო, მისი გარდაცვალების შემდეგ კი დამოუკიდებლად შეისწავლა. 2010 წლიდან აქტიურად ჩაერო საქმიანობაში.
“ეს საქმიანობა ქალისთვის რთულია და მიფიქრია, მისი არჩევისას შეცდომა ხომ არ დავუშვი, მაგრამ თევზი მასზე დამოკიდებულს გხდის იმდენად, მისი გამოზრდის პროცესი, რომ ემსახურები საქმიანობას, რომელიც გიყვარს და იქ სქესს მნიშვნელობა აღარ აქვს.”
სოფოს აზრით, მეთევზეობის განვითარების პირველი ხელისშემშლელი მიზეზი არასერიოზული დამოკიდებულება და საქმის ზედაპირული შესრულებაა. ყურადღება არ ექცევა დეტალებს, მაგ. წყლის ხარისხს, თევზის ხარისხს, ჩასასმელი მასალის საკითხს. სთავაზობს ადგილობრივ ფერმებს ჯანსაღი გენეტიკის ლიფსიტას.
“ყველაზე დიდ სიამოვნებას 2 რამ მანიჭებს – თევზთან ურთიერთობა და ადგილობრივ ქალთა დასაქმება, მინდა, რომ ოჯახური საქმიანობის გარდა სამსახურიც ჰქონდეთ”.
კომენტარები