როგორ აისახება ეკონომიკაზე კომუნალურების სუბსიდირება? – გუჯა ხაბაძის ეკონომიკური ბლოგი

დღეს ცნობილი გახდა, რომ საქართველოში მცხოვრებ მოქალაქეთა გარკვეული კატეგორიის კომუნალური ხარჯები სამი თვის განმავლობაში სახელმწიფო ბიუჯეტიდან დაიფარება. ეს გადაწყვეტილება, არსებულ კრიზისულ ვითარებაში, თამამად შეიძლება ითქვას, რომ სასიცოცხლოდ მნიშვნელოვანია. აღნიშნული გადაწყვეტილების ობიექტური შეფასებისთვის გასათვალისწინებელია, თუ რა ეფექტს იქონიებს ზემოთ ხსენებული გადაწყვეტილება სახელმწიფოს ეკონომიკურ მდგომარეობაზე. ყველაფერი დამოკიდებულია იმაზე, როგორ დაბალანსდება ბიუჯეტიდან გამოყოფილი ფინანსური რესურსის დანახარჯი. თუ ამ სერვისებზე ანგარიშსწორება მოხდება იმ თანხების საფუძველზე, რაც დაიზოგა საჯარო ინსტიტუციების დისტანციურ მართვაზე გადასვლით (ელექტროენერგია,გაზმომარაგება და ა.შ) , სხვადასხვა სპორტული თუ კულტურული ღონისძიების გაუქმებით და ზოგადად, ყველა იმ დანახარჯით, რომელიც აქამდე იყო გათვალისწინებული სხვადასხვა ბიუროკრატიული მომსახურებისთვის, მაშინ ეს გადადგმული ნაბიჯი შეიძლება, რელევანტურად ჩაითვალოს. თუ ოჯახების კომუნალური სერვისების ფინანსური ვალდებულების დაფარვა მოხდება სხვა მეთოდიკით, რაც გულისხმობს, ფულის ერთეულის ბეჭდვას (ინფლაციის მთავარი წყარო), საგარეო ვალის აღებას და ა.შ . ეს გამოიწვევს მძიმე ეკონომიკური ვითარების კიდევ უფრო დამძიმებას. ამიტომ, რაციონალური და მართებული სვლა, გაწეული ხარჯების დაბალანსებისთვის, იქნება გარკვეული ბიუროკრატიული მომსახურების გაუქმებით ან შეკვეცით მიღებული ფინანსური სარგებელი. რაც სახელმწიფოს ეკონომიკური კონდიციის და კურსის რეგრესირებას არ გამოიწვევს.

მთავრობის გადაწყვეტილებით, მომხმარებლებს, რომლებიც 200 კილოვატზე ნაკლებ ელექტროენერგიას და 200 კუბურ მეტრზე ნაკლებ ბუნებრივ აირს მოიხმარენ, 3 თვის განმავლობაში კომუნალური გადასახადი სრულად დაუფინანსდებათ.

დღევანდელი მონაცემებით, ელექტროენერგიის, წყლის და დასუფთავების გადასახადი ეხება 1 მილიონ 200’000 ოჯახს, ხოლო 650’000 ოჯახს ეხება გაზის გადასახადი.

ზემოაღნიშნული შეღავათი განკუთვნილი ისეთი კატეგორიის ოჯახებისთვის,  რომელთაც რეალურად ამ პირობებში ასეთი ტიპის მხარდაჭერა სჭირდებათ, ძირითადად, ოჯახებისთვის, რომლებმაც დაკარგეს სამსახურები. თუმცა, უნდა აღინიშნოს, რომ აღნიშნული სარგებლის მიმღებთა ნაწილი იქნება ისეთი პირები, რომელთაც არ დაუკარგავთ სამსახური და მიუხედავად ყველაფრისა, აქვთ შემოსავალი. შესაბამისად, საბიუჯეტო სახსრების ნაწილი შესაძლებელია, არამიზნობრივად დაიხარჯოს.