დანდალო — სოფელი საქართველოში, აჭარის ავტონომიური რესპუბლიკის ქედის მუნიციპალიტეტში, დანდალოს ადმინისტრაციული ერთეულის ცენტრი (სოფლები: ბალაძეები, გოგიაშვილები, დანდალო, მოსიაშვილები, ტაკიძეები, ხარაულა, ჯალაბაშვილები). 2014 წლის აღწერის მონაცემებით, სოფელში ცხოვრობს 347 კაცი.
მდებარეობს აჭარის ქვაბულში, მდინარე აჭარისწყლის მარცხენა მხარეს, ტაფობში, რომელიც საკმაოდ ვრცელ ველს წარმოადგენს. დანდალო ერთმანეთისგან ყოფს ზემო აჭარასა და ქვემო აჭარას.
სოფელში არის შუა საუკუნეებით დათარიღებული თაღოვანი ხიდი – დანდალოს ხიდი, რომლის აშენებასაც ადგილობრივები საქართველოს ქალი მეფის – თამარის სახელს უკავშირებენ.
სოფლის განაპირას, აღმოსავლეთით დგას გვიან ფეოდალური ხანის კავიანის ციხე. გადმოცემით, კავიანი ციხეს იმიტომ ჰქვია, რომ მხოლოდ კავით შეიძლება მასზე ასვლა. სხვა ვერსიით კი – “ქავი”გალავანს ნიშნავს და აქედან მოდის ციხის ნამდვილი სახელი – “ქავიანი”.
www.asea.ge
კომენტარები