კომერციულ მოსყიდვაში დადანაშაულებული შპს–ს ყოფილი დირექტორი ახალ შპს–ში დაასაქმეს

ახალი შპს „ქედის ტურიზმის განვითარების ხელშეწყობის ცენტრი“,  რომელმაც ქედაში არსებული ტურისტული ლოკაციების განვითარებასთან ერთად, ახალი ლოკაციებისა და სერვისების შექმნაზე უნდა იმუშაოს, მიმდინარე წლის მარტში დაფუძნდა.

შპს–ში, რომელსაც სულ 3 თანამშრომელი ჰყავს [დირექტორი, სპეციალისტი და ბუღალტერი], დაფუძნებიდან რამდენიმე დღეში ქედის მერიის დაქვემდებარებაში არსებული შპს „ქედის კომუნალურსერვისის“ ყოფილი დირექტორი, მალხაზ სურმანიძე, სპეციალისტის პოზიციაზე  უკონკურსოდ დანიშნეს.

მალხაზ სურმანიძე შპს „კომუნალურსერვისში“ მუშაობის დროს, კომერციულ მოსყიდვაშია დადანაშაულებული.

სასამართლოს დავა 2018 წლის ნოემბრის თვეში დასრულდა და სასამართლო გადაწყვეტილებით, მალხაზ სურმანიძე სისხლის სამართლის კოდექსის 221 მუხლის მე–3 ნაწილით გათვალისწინებული დანაშაულის ჩადენისთვის დამნაშავედ იქნა ცნობილი და ორი წლით პირობითი თავისუფლების აღკვეთასთან ერთად, დამატებითი სასჯელის სახით 7 ათასი ლარის გადახდა დაეკისრა.

შპს–ს დირექტორი, რომელიც კომერციული მოსყიდვისთვის გაასამართლეს, განაჩენიდან რამდენიმე დღეში მუშაობას აგრძელებს ახალ შექმნილ შპს–ში. „კომუნალურსერვისის“ დირექტორის პოზიცია კი მან გასულ წელს საკუთარი განცხადების საფუძველზე დატოვა, მიზეზად  ჯანმრთელობის მდგომარეობა დაასახელა.

მალხაზ სურმანიძის საქმე არასამთავრობო ორგანიზაცია „საერთაშორისო გამჭვირვალობა – საქართველოს” 2019 წლის კვლევაში მოხდა, სადაც მითითებულია, რომ მამამ საკუთარი შვილი იმ შპს–ში დაასაქმა, სადაც თავად დირექტორად მუშაობდა.

რა პრინციპითა და დამსახურებით შეარჩიეს კადრები? ჩვენ ეს კითხვა შპს–ს დირექტორს, რაულ ცინცაძეს, დავუსვით, რაზედაც გვიპასუხა, რომ კადრების შერჩევისას მთავარი აქცენტი პროფესიონალიზმსა და სამუშაო გამოცდილებაზე გაკეთდა.

„ჩემთვის უმთავრესია განათლება და სამუშაო გამოცდილება ტურიზმის მიმართულებით, რამდენად გათვითცნობიერებული არიან შესარჩევი კადრები და რამდენად შეესაბამებიან ამ სამსახურის მიზნებსა და ამოცანებს.

მალხაზ სურმანიძე წლების განმავლობაში შპს–ს დირექტორია და იქიდან გამომდინარე, რომ შპს „კომუნალურსერვისი“ ამ მიმართულებით მუშაობს, ცხადია, სურმანიძე გამოცდილი კადრია, ამიტომაც მივიღე მისი სპეციალისტის პოზიციაზე დანიშვნის გადაწყვეტილება.

რაულ ცინცაძეს ჩვენ, ასევე, ვკითხეთ, უქმნის თუ არა უხერხულობას, მისი თანამშრომლის ბეგრაუნდი და რატომ არ აიყვანა თანამშრომლები კონკურსის წესით, რაზედაც გვიპასუხა, რომ პანდემიის ფონზე კონკურსის ჩატარება შეუძლებელი იყო.

შპს–ს 100%-იანი წილის მფლობელი ქედის მერიაა, შესაბამისად, ფუნქციონირებისთვის საჭირო თანხებს ადგილობრივი თვითმმართველობა გამოყოფს.