პირველი მართლმადიდებელი მღვდელმთავარი, რომელმაც კოვიდ 19-ის საწინააღმდეგო აცრა გაიკეთა

მსოფლიოს უხილავი მტერი – მძვინვარებს. დედამიწაზე ყოველდღიურად ათასობით ადამიანი იღუპება ახალი კორონავირუსისგან. საზოგადოების აზრი კი covid-19-ის მიმართ სამ ნაწილადაა გაყოფილი. მოსახლეობის დიდ ნაწილს ეს მომაკვდინებელ ვირუსად მიაჩნია და მისი დამარცხების იარაღად მედიცინა და მედიკოსების რჩევები ესახებათ. მათგან რადიკალურად განსხვავებული მოსაზრება აქვთ “კორონა-სკეპტიკოსებს”, რომელთაც სჯერათ, რომ არანაირი მომაკვდინებელი ვირუსი არ არსებობს და სტატისტიკა ხელოვნურად არის გაბერილი. რომ კოვიდ-19-ით გარდაცვლილი ადამიანები სხვა ქრონიკულ დაავადებებს ემსხვერპლნენ.

ასევე, საზოგადოების არცთუ ისე მცირე ნაწილი კონსპირაციულ თეორიას იზიარებს დეზინფორმაციაზე დაყრდნობით. სოციალურ ქსელში ხშირად შეგხვდებათ ფრაზები: “კორონავირუსიანი ბანანები”, „კოვიდ-რედ ბული“, „წინასწარმეტყველების ორცხობილა“, „ბიოლოგიური იარაღი“, „წინასწარ დაგეგმილი სცენარი“, “ვაქცინით ანტიქრისტეს ჩიპი შეჰყავთ”. ჩნდება ტოტალური უნდობლობა საფრთხის წინააღმდეგ, რომელმაც მსოფლიოში 80 მილიონზე მეტი ადამიანი დააინფიცირა, რომელთაგან 1.76 მილიონზე მეტი დაიღუპა.

Covid 19 – პანდემია, რომელმაც მსოფლიო აიძულა რეკორდულ ვადაში – 1 წელში დაემზადებინა ვაქცინა, მაშინ, როცა ყბაყურას ვაქცინა, რომელიც 4 წელში დამზადდა, ყველაზე სწრაფად დამზადებულად ითვლებოდა. ამჟამად აშშ–ის, გერმანიის, ჩინეთის, რუსეთისა და ბელგიის სახელმწიფოების ლაბორატორიების მიერ დამზადებულია 5-ზე მეტი ვაქცინა, ესენია: ფაიზერი, მოდერნა, ასტრაზენეკა, სინოფარმი, ჯონსონი და ჯონსონი და ა.შ.

დიდ ბრიტანეთში,  აშშ-სა და ევროკავშირის ქვეყნებში კი დაიწყო მასიური ვაქცინაცია.

ზემოთ ხსენებული კონსპირაციული თეორია მსოფლიოში საკმაოდ დიდი პოპულარობით სარგებლობს და საზოგადოებაში აქტიურად ავრცელებს ინფორმაციას ვაქცინაციის წინააღმდეგ, ერთ–ერთი თეორიის თანახმად, ვაქცინაციის შედეგად შესაძლოა, სხეულში შეყვანილი იქნას ჩიპი. აღნიშნული თეორია განსაკუთრებით უარყოფითად მოქმედებს მართლმადიდებელ მრევლზე, რასაც ხელს უწყობს სასულიერო პირების მიერ ზემოთ ხსენებული თეორიის აქტიური პოპულარიზაცია.

მოცემული დეზინფორმაციისა და შეთქმულების თეორიის წინააღმდეგ გაერთიანდნენ დიდი კორპორაციები: გუგლი, ფეისბუქი და ტვიტერი. 2020 წლის 27 დეკემბერს საბერძნეთში კორონავირუსული ინფექციის საწინააღმდეგო ვაქცინაცია დაიწყო და ამ პროცესს შეუერთდა მსოფლიოში ცნობილი და აღიარებული მართლმადიდებელი ღვთისმეტყველი და მქადაგებელი, მრავალი საღვთისმეტყველო წიგნის ავტორი, მონასტრული ასკეტიზმის აღიარებული მაგალითი და მასწავლებელი, საბერძნეთის მართლმადიდებელი ეკლესიის მღვდელმთავარი, ნავპაქტოსისა და წმიდა ვლასიის მიტროპოლიტი იეროთეოს ვლახოსი. 27 დეკემბერს არსებული ოფიციალურად გასაჯაროებული ინფორმაციების მიხედვით, მიტროპოლიტი იეროთეოსი მსოფლიოში პირველი მართლმადიდებელი მღვდელმთავარია, რომელმაც კორონავირუსის საწინააღმდეგო ვაქცინა გაიკეთა. მოსახლეობისთვის მაგალითის მისაცემად საბერძნეთის ეკლესიის მეთაურის, უნეტარესი იერონიმე მეორის ნაცვლად (მან ახლახან გადაიტანა კორონავირუსი და მისი ვაქცინაცია არ შეიძლებოდა) და მასთან შეთანხმებით, მეუფე იეროთეოსმა საჯაროდ ჩაიტარა ვაქცინაცია ანუ აცრა.  იგი 75 წლის არის და დაავადებულია შაქრიანი დიაბეტით.

საბერძნეთის ეკლესიის ეს ნაბიჯი მიმართულია მორწუნეთა ნაწილში ანტიმეცნიერული, ანტისამედიცინო, სექტანტური შიშებისა და ცრუ ინფორმაციების გასაქარწყლებლად, რაც საბერძნეთის მოსახლეობაშიც საგრძნობია ისევე, როგორც საქართველოში.

მსოფლიო სტატისტიკაში საქართველო მოწინავე ქვეყანაა მოსახლეობის დაინფიცირების მიხედვით. ერთადერთი „ვაქცინა,“ რომელსაც ჩვენი ხელისუფლება პანდემიის წინააღმდეგ იყენებს, ლოქდაუნია. საქართველოს მთავრობა ირწმუნება, რომ ვაქცინაციისთვის გამოყოფილია და გადარიცხულია კონკრეტული თანხა, თუმცა მოცემულ მომენტში არც ვაქცინაციის ვადა არ ვიცით და არც ვაქცინა ჩანს არსად!..

_{წყარო: Koronaios: The Metropolitan of Nafpaktos Hierotheos was also vaccinated en | En24 World (en24news.com)}