კოვიდპანდემიის გამო საქართველოს მთავრობის მიერ გამოცხადებული ე. წ. წერტილოვანი შეზღუდვები ბიზნესსა და მოქალაქეებს, უკვე მეორედ, მძიმე ტვირთად დააწვა. 28 ნოემბრიდან არაერთი ობიექტი დაიხურა და ადამიანები კვლავ გადაულახავი დაბრკოლებების წინაშე აღმოჩნდნენ.
მთავრობის მიერ შემოღებულმა აკრძალვებმა, რომელსაც საზოგადოების ნაწილი სრულ ჩაკეტვად ანუ ლოკდაუნად აღიქვამს, ეკონომიკური და სოციალური ფონი ისევ დაამძიმა. გარდა იმისა, რომ თვითონ ბიზნესის მფლობელებს ფინანსური ზარალი მიადგათ და ეს ზარალი კიდევ უფრო გაიზრდება, შემოსავლის გარეშე დარჩა არაერთი დასაქმებული.
განსაკუთრებულად გაუჭირდებათ ზამთრის კურორტებს, რომლებმაც სრული დატვირთვით ვერც გასულ სეზონზე იმუშავეს, რადგან შეზღუდვების პირველი ეტაპი სწორედ სეზონის დახურვამდე დაიწყო. ზაფხულის კურორტებისგან განსხვავებით, მათ იმის საშუალებაც არ ჰქონდათ, რომ ზარალი, შიგა ტურიზმის წყალობით, ოდნავ მაინც შეემსუბუქებინათ.
გოდერძისა და გომარდულის ზამთრის კურორტებზე სასტუმროებისა და სხვა ტურისტული ობიექტების მფლობელები და იქ დასაქმებულები მთელი წელი ახალი სეზონისთვის ემზადებოდნენ. მათ ეპიდემიოლოგების მიერ გაცემული ყველა რეკომენდაცია შეასრულეს, უსაფრთხოებისთვის საჭირო ყველა საშუალებით აღიჭურვენ და ელოდებოდნენ, რომ დეკემბრიდან პირველ სტუმრებს მიიღებდნენ. რამდენიმე სასტუმროში უკვე არაერთი ნომერი დაჯავშნილი იყო.
ნოემბრის ბოლოს კი საქართველოს მთავრობამ მათ აუწყა, რომ ზამთრის კურორტები დაიხურება და იქ მდებარე სასტუმროებს მხოლოდ კოვიდსასტუმროებად ფუნქციონირების საშუალება ექნება. ბიზნესის წარმომადგენლები ამ გადაწყვეტილებას გაგებით ეკიდებიან, თუმცა მიაჩნიათ, რომ ზამთრის კურორტებზე კოვიდის გავრცელების საფრთხე გაცილებით ნაკლებია და მთავრობას შეეძლო, ზომების გამკაცრების მოთხოვნით, მათთვის სტუმრების მიღების უფლება მიეცა.
Asea.ge რამდენიმე მათგანს ესაუბრა და მთავრობის მიერ შემოღებული აკრძალვების შეფასება სთხოვა.
ჯუმბერ ჭყონია, სასტუმრო „მეტეოსა“ და გოდერძის ვილების მმართველი კომპანია „ხიდი 2006“: „რადგან ადამიანების სიცოცხლეზეა საუბარი, ამ აკრძალვებს გაგებით ვეკიდებით, მაგრამ ფაქტია, რომ ასობით ათასი ლარის ზარალს ვნახავთ. მომზადებული ვიყავით გასახსნელად, მაგრამ დავკეტეთ. გოდერძიზე ადამიანების აყვანა სახელმწიფოს რამდენად დასჭირდება და საკარანტინო სივრცედ გამოიყენებს, არ ვიცი… გამორიცხულია, რომ ამხელა გზაზე ადამიანები აიყვანო, მით უმეტეს, ზამთრის პირობებში, ჩვეულებრივი სატრანსპორტო საშუალებით ვერ გადაადგილდები, მაღალი გამავლობის ტრანსპორტია საჭირო.
აქ ინფექციის გავრცელების დიდი საფრთხე არ იყო. ადგილობრივ ტურისტებს ველოდებოდით, მაგრამ თქვენც იცით, რა სიტუაციაა ქვეყანაში. ამ თვეების განმავლობაში ბიზნესი საერთოდ ნულზე დავიდა და ამდენი უმუშევარი ადამიანია. ამიტომ რაღაც გეგმები გვქონდა ტურისტების მოსაზიდად. გასულ წლებთან შედარებით, ფასების გაიაფებას ვაპირებდით, რომ ადამიანებს ელემენტარულად ფსიქოლოგიური განტვირთვა მაინც შეძლებოდათ. რადგან ჩაიკეტა, ახლა ვერაფერს ვერ ვაკეთებთ.
მთლიანად ვირუსის გავრცელების საშიშროებას ვერ გამოვრიცხავთ, მაგრამ რა რეკომენდაციებიც გვქონდა, ყველაფერი გავითვალისწინეთ. ჩვენ მეორე სასტუმროც გვაქვს ბეშუმში. დაახლოებით ოთხი წლის წინ გავხსენით. მთელი დეკემბერი დაჯავშნილი იყო, გავაუქმეთ და თანხა დავაბრუნეთ. დაახლოებით 8 000 ლარამდე იყო შემოსული წინასწარი გადახდით. 24 დეკემბრიდან 2 იანვრის ჩათვლით რომ იხსნება, მაგ დროს თუ ვინმეს სურვილი ექნება და ამოვა, რამდენად მოსახერხებელი იქნება, ისიც არ ვიცით. სეზონის განმავლობაში 500-600 ათასი ლარის შემოსავალი გვქონდა და ახლა ამას ვიზარალებთ.
შესაძლებელი იყო, ასეთი მკაცრი ზომების ნაცვლად, თვითონ ობიექტებზე ყოფილიყო მეტი კონტროლი. უკეთესი იქნებოდა, ბიზნესს ემუშავა. ამდენი ადამიანი დარჩა უმუშევარი. წინა პერიოდში რომ დავიკეტეთ, პერსონალს ხელფასს ვუხდიდით. იმდენს ვერა, რამდენიც აქვთ საერთოდ, მაგრამ ნაწილობრივ შევუნარჩუნეთ. ოთხმოცი თანამშრომელი გვყავს და მინიმალურს, 400 ლარს ვუხდიდით თითოეულს. ახლა უკვე ვეღარ ვახერხებთ. დღეს ობიექტებზე მხოლოდ უსაფრთხოების სამსახური გვყავს შენარჩუნებული. დანარჩენი, დაახლოებით სამოცდაათი ადამიანი, რომლებსაც ვეღარ გადავუხდით, გავუშვით. არანაირი შემოსავალი აღარ გვაქვს.
ეს ადამიანები, უკვე წლებია, ჩვენი თანამშრომლები არიან. ვიცით, ვის რა შესაძლებლობა აქვთ, გადამზადებული არიან. შესაბამისად, რთული გადაწყვეტილება იყო და მომავალში ბიზნესის აღდგენაც რთული იქნება. ვიცით, რომ მთავარი ჯანმრთელობაა, თუმცა უმუშევრობა ფსიქოლოგიურად მოქმედებს ადამიანზე. ძალიან რთული სიტუაციაა.“
ჩვენ შპს „გომარდულის“ წარმომადგენელსაც ვესაუბრეთ. ამ კომპანიის ქონება სახელმწიფოს დაყადაღებული აქვს და ყოველთვიურად 4 000 ლარზე მეტის გადახდა უწევს. ამას ემატება ისიც, რომ კომპანია იჯარით აიღო უკრაინის მოქალაქემ, რომელსაც გადაწყვეტილი აქვს, ბიზნესი სპორტულ-გამაჯანსაღებელი მიმართულებით განავითაროს. უკვე წლებია, კურორტი სრული დატვირთვით ვერ ფუნქციონირებდა და პერსონალს იმედი ჰქონდა, რომ ამ ზამთრის სეზონზე გარკვეულ შემოსავალს მიიღებდა. თუმცა აღმოჩნდა, რომ ახლა მხოლოდ გადარჩენაზე უნდა იზრუნოს.
ბადრი ქათამაძე, შპს „გომარდულის წარმომადგენელი: „ჩვენ ყადაღის გამო ისედაც პრობლემები გვქონდა. ამ სეზონზე გვქონდა მზაობა, რომ შიგა ტურისტებს მოვემსახურებოდით. უკვე გვირეკავდნენ, პირობებს გვეკითხებოდნენ. ახლა შემოსავალი არ გვექნება. ჩვენ კოვიდსასტუმროდ ვერ ვიფუნქციონირებთ. ასეთი პირობები არ არის. ბუნებრივი აირი აქ არაა შემოყვანილი და შეიძლება, გათბობის პრობლემა შეიქმნას. ამიტომ კოვიდსასტუმროდ ვერ გადავკეთდებით.
ჩვენ მთელი წელი არ გვიმუშავია, მხოლოდ თავს ვირჩენდით. აწი არ ვიცი, როგორ ვიქნებით. აქ სპორტულ-გამაჯანსაღებელი კომპლექსი გვაქვს, მსურველები იქნებიან, მაგრამ აკრძალვები ამ ბიზნესსაც შეეხო. საერთოდ გავჩერდებით, ალბათ. პერსონალს ჯერჯერობით ვინარჩუნებთ და შეიძლება, ერთ თვეს კიდევ გავართვათ თავი. მერე თუ დაგვთანხმდებიან, რომ უხელფასოდ იმუშაონ მცირე დროით… რამენაირად უნდა გავიტანოთ თავი. ამ სეზონზე, დაახლოებით, 20-30 ათას ლარს ველოდებოდით, ეს საკმარისი იქნებოდა თავის შესანახად, ხელფასების გასაცემად. ჩვენ ყადაღას ვიხდით და ამ ეტაპზე შეგვიჩერეს ახალ წლამდე. მერე ისევ მივმართავთ თხოვნით.
აქ, ჩვენთან, შეიძლებოდა უსაფრთხოების დაცვა. მთის კურორტების დაკეტვა, ჩემი აზრით, აუცილებელი არ იყო.“
საქართველოს ბიზნესასოციაციების წარმომადგენლები მთავრობის მიერ მიღებულ გადაწყვეტილებას უკვე საჯაროდ აკრიტიკებენ. ეს ნიშნავს, რომ სიტუაცია მართლაც უკიდურესად მძიმეა. არსებობს მოლოდინი, რომ არაერთი ბიზნესი შოკური მდგომარეობიდან ვერ გამოვა და დაიხურება. ფაქტია, რომ ეს ქვეყნის ეკონომიკას ჩიხში კიდევ უფრო ღრმად შეიყვანს. გარდა ამისა, არაერთი დასაქმებული და თითოეული ამ დასაქმებულის უკან მდგარი ოჯახები, პირდაპირი მნიშვნელობით, შემოსავლის გარეშე რჩებიან. პარალელურად, შეუძლებელი ხდება საბანკო ვალდებულებების გამკლავება, რაც, საბოლოო ჯამში, არაერთი ბიზნესისა და მოქალაქის ქონებას შეიწირავს.
www.asea.ge
კომენტარები