“ეკო სოკო” – ლამპიონი, რომელიც ჟანგბადს გამოიმუშავებს

სანამ ჩვენ ასწლოვან “ბუნების ფილტვებს” ბოლო ტოტებს ვაჭრით ახალი კორპუსების ჩასადგამად და ჰაერში ტყვიის შემცველობით ახალ-ახალ მსოფლიო რეკორდებს ვამყარებთ, ცივილიზებული სამყარო მწვანე ზოლის დაცვასთან ერთად ბუნების გაჯანსაღების ტექნოლოგიურ საშუალებებს ნერგავს. “ეკო სოკო” არის მზის ენერგიაზე მომუშავე ქუჩის ლამპიონი, რომელიც, დამატებით, ჰაერის ფილტრის ფუნქციას ითავსებს, შთანთქავს გამონაბოლქვს და გამოიმუშავებს ჟანგბადს. ცენტრალური გზები წარმოადგენს ეკოლოგიურად ერთ-ერთ ყველაზე დაბინძურებულ ადგილს, საიდანაც გამონაბოლქვი იფანტება, ვრცელდება მთელი ქვეყნის ტერიტორიაზე და ქმნის ტოქსიკურ ატმოსფეროს, ასევე, უდიდეს გავლენას ახდენს კლიმატის ცვლილების პროცესზე. “ეკო სოკო” კი პირდაპირი და გადატანითი მნიშვნელობით გამონაბოლქვის პირველი მტერია. იგი გზიდან შთანთქავს გამოფრქვეულ ტოქსიკურ აირებს, APS- ს სისტემის მეშვეობით, ლამპიონის ცენტრში განლაგებული მოწყობილობა გადაამუშავებს, ფილტრავს ჰაერს და უკან უბრუნებს ბუნებას.
გარდა ზემოთ ჩამოთვლილი სამი სასარგებლო თვისებისა (განათება, ცუდი აირების შთანთქვა და სუფთა ჰაერის გამოყოფა), ამ ინოვაციურ დანადგარს აქვს კიდევ ერთი უნიკალური თვისება-დანიშნულება. დაბინძურებული ჰაერის შესახებ მონაცემებს აგზავნის კვლევისა და ანალიზის ცენტრში, სადაც საშუალება აქვთ დისტანციურად შეისწავლონ ატმოსფეროს ეკოლოგიური მდგომარეობა და ტენდენციები გზის სხვადა– სხვა მონაკვეთზე. რაც მთავარია, ამ ყველაფრისთვის ის თავად გამოიმუშავებს ელექტროენერგიას თავზე დამაგრებული მზის პანელებით.