ბაღის თანამშრომლები აჭარის მთიანეთში გაზრდილ ხელფასს მარტის თვიდან აიღებენ

აჭარის მაღალმთიანი მუნიციპალიტეტების [ქედა, შუახევი, ხულო] საბავშვო ბაღებში დასაქმებული თანამშრომლები მარტის თვიდან გაზრდილ ხელფასს აიღებენ. შესაბამისი მერიების ინფორმაციით, დანამატი 19-21 % იქნება და სხვადასხვა პოზიციაზე დასაქმებული თანამშრომლების ხელფასი საშუალოდ 80-100 ლარით გაიზრდება. გაზრდილი თანხის ოდენობას კი სახელფასო სარგო განსაზღვრავს. პროცენტული დაანგარიშებით, 100 ლარით იმ თანამშრომლების სახელფასო სარგო გაიზრდება, ვისი ანაზღაურებაც შედარებით მაღალია, 80 ლარით კი – მას, ვისაც ნაკლები ანაზღაურება აქვს.

შუახევის მერიის, საფინანსო სამსახურის უფროსის, ანზორ ცეცხლაძის, ინფორმაციით, მაქსიმუმ – 100 ლარით გაზრდილ ხელფასს საბავშვო ბაღის ადმინისტრაციის თანამშრომლებთან ერთად აღმზრდელები, მედდები და ჭურჭლის მრეცხავებიც მიიღებენ.

„დეკემბერშიც ვფიქრობდით ხელფასების ზრდას ამ სფეროში დასაქმებული თანამშრომლებისთვის, მაგრამ რადგანაც არ დაიწყო საგანმანათლებლო პროცესი და მარტში განახლდება, გაზრდილ ხელფასს თანამშრომლები 1–ლი მარტიდან აიღებენ. ბიუჯეტში ასახულია ხელფასის ზრდა.

მაქსიმუმ 100 ლარით გაიზრდება ანაზღაურება. თანამშრომლებს შორის გაზრდილი ხელფასით სხვაობა 10 ლარი იქნება. საბავშვო ბაღში დასაქმებულებთან ერთად მარტის თვიდან გაზრდილ ხელფასს აიღებენ საბავშვო ბაღების გაერთიანებაში დასაქმებულებიც  – 100 ლარის ოდენობით,“ – აცხადებს ანზორ ცეცხლაძე და დასძენს, რომ გაზრდილი ხელფასის გასაცემად თანხა ადგილობრივ ბიუჯეტში 10 თვის მონაცემია გაწერილი. იმისთვის, რომ შუახევის მერიამ სკოლამდელი განათლების სფეროში მომუშავეებს ერთი თვის განმავლობაში გაზრდილი ხელფასი გასცეს, 17 ათას ლარამდე თანხაა საჭირო.

რაც შეეხება ქედის მუნიციპალიტეტს, აქ საბავშვო ბაღის თანამშრომლების ხელფასი 19-21 % – ით გაიზრდება და თანხობრივად 80 – 100 ლარით მოიმატებს. შუახევის მსგავსად, აქაც გაზრილ ხელფასს თანამშრომლები მარტის თვიდან აიღებენ.

„1 მარტიდან ძალაში შევა  შესაბამისი დოკუმენტი, მანამდე კი ბიუჯეტის ცვლილებისას დავამატებთ ფინანსური რესურსით უზრუნველყოფას. ხელფასების ზრდის გადაწყვეტილება მიღებულია, დარჩენილია მხოლოდ ტექნიკური დეტალები. თანამშრომლები გაზრდილ ხელფასს 1–ლი მარტიდან აიღებენ.

ამ სფეროში დასაქმებულ თანამშრომლებს, ყველას გაეზრდება ხელფასი  80, 90 და 100 ლარით. სამართლიანობის პრინციპი დაცული იქნება და ყველას თანაბრად გაეზრდება ხელფასი, გაზრდილი თანხის სხვაობას, განსხვავებული სახელფასო სარგო განაპირობებს,“ – გვითხრა ჯემალ ტაკიძემ, ქედის მერიის საფინანსო სამსახურის უფროსმა.

ქედაში საბავშვო ბაღების თანამშრომლების გაზრდილი ხელფასის გასაცემად თვეში 25 ათას ლარამდე თანხა იქნება საჭირო;

რაც შეეხება ხულოს მუნიციპალიტეტს, აქ აცხადებენ, რომ დანამატის ოდენობა ქედისა და შუახევის მსგავსი იქნება.

„80-100 ლარით გაიზრდება ხელფასი. ამ საკითხზე ახლაც მიმდინარეობს მუშაობა. ვცდილობთ, არ იყოს განსხვავებული ხელფასი და ჩვენთან დასაქმებულ თანამშრომლებს ისეთივე ანაზღაურება ჰქონდეთ, როგორც შუახევსა და ქედაში,“ – ამბობს ნადიმ ვასაძე, ხულოს მერის მოადგილე.